روح استقوي على جلاّدك
على مين عم تستقوي يا قبضاي،على مين عم ترفع صوتك وتضرب وتهدد وتستعرض
على مين ؟
روح يا قبضاي شمّر زنودك وارفع صوتك على اللي عم يسرقوا لقمتك من تم ولادك ويغرّبوا ولادك!!!!
أي سرطان ناطر ؟ او أمراض الكلى؟ من تلوث الليطاني والقرعون او البحر المتوسط…او امراض الربو والحساسية والجلد من المحارق او تلوث الخضار المغسولة بالمجارير؟
روح فش خلقك باللي سرق الاملاك العامة البرية والبحرية …من اللي خلاك تنبش بالزبالة تا تاكل
من اللي عم يهجّرك من بيتك بقانون الايجار
من اللي مانعك تتطبب الا باتصال شحادة؟
ومانعك تتوظف الا ببوس اللحى؟
قلن انك لبناني بلا ضمان وتأمين
قلن انك لبناني بتستقوي على شاب أعزل
هيك بتحمي جيشك اللي معاشه ما بدن يدفعوا النواب الحراميي والمافيا الحاكمة….؟
قلن هيك بتطالب بحقة بعيشة كريمة
فيق يا لبناني بيو للفقيد عاكوش عم يبكي ابنو اللي مات على الطرقات لان زعبوا من مستشفيات النبطية وصيدا وبيروت
فيق ولادك عم يموتوا من رصاص طايش ووزير الداخلية بدو ثورة تا يحميك
فيق …. حاج تستقوي
فيق واخجل …
#عنصرية_مقيتة
#استقوي_على_جلادك
Neamat Bader Al Deen
